കണ്ണൂർ വിമാന താവളത്തിന് ​അന്താരാഷ്ട്ര അവാർഡ്

കണ്ണൂർ: കണ്ണൂർഅന്താരാഷ്ട്ര വിമാനത്താവളത്തിന്​ ലഭിച്ച അന്താാഷ്ട്ര അവാർഡ്​ കിയാൽ അധികൃതർ ഏറ്റുവാങ്ങി.ഏഷ്യ -പസഫിക് മേഖലയിലെ പ്രതിവർഷം 20 ലക്ഷം യാത്രക്കാരിൽ താഴെ കൈകാര്യം ചെയ്യുന്ന വിമാനത്താവളങ്ങൾക്കുള്ള എയർപോർട്ട്​ സർവീസ്​ ക്വാളിറ്റി  (എഎസ്​ക്യു) സർവേയിലെ ‘ബെസ്റ്റ് എയർപോർട്ട്’ അവാർഡിനാണ്​ കണ്ണൂർ അന്താരാഷ്ട്ര  വിമാനത്താവളത്തെ തെരഞ്ഞെടുത്തത്​. സെപ്റ്റംബർ എട്ടു മുതൽ 11 വരെ ചൈനയിലെ ഗ്വാങ്സോയിൽ നടന്ന  എയർപോർട്ട് കൗണ്‍സിൽ ഇന്‍റർ നാഷണൽ എക്സ്പീരിയൻസ് സമ്മിറ്റ് 2025ൽ  കിയാൽ മാനേജിങ്​ ഡയറക്ടർ സി ദിനേശ് കുമാറും ചീഫ് ഓപ്പറേറ്റിങ്​ ഓഫീസർ  അശ്വനി കുമാറും എസിഐ ഡയറക്ടർ ജനറൽ  ജസ്റ്റിൻ എർബാക്കി, അമഡിയസിന്‍റെ ഏഷ്യ-പസഫിക് എയർപോർട്ട്സ്  ആൻഡ്​ ബോർഡർ അതോറിറ്റീസ് സീനിയർ വൈസ് പ്രസിഡന്‍റ്​  സാറ സാമുവൽ എന്നിവരിൽ നിന്ന് പുരസ്കാരം ഏറ്റുവാങ്ങി.

ഈ ആഗോള വേദിയിൽ ഇത്തരമൊരു അംഗീകാരം നേടുന്നത് കണ്ണൂർ വിമാനത്താവളത്തിനും കേരളത്തിനും അഭിമാനകരമായ നിമിഷമാണെന്നും പ്രവർത്തന മികവും, ടീമിന്‍റെ സമർപ്പണവും, യാത്രക്കാരുടെ സൗകര്യത്തിനായി ചെറിയ കാര്യങ്ങളിലെ ശ്രദ്ധയുമാണ്​ ഈ അംഗീകാരത്തിന് വഴിയൊരുക്കിയതെന്നും മാനേജിങ്​ ഡയറക്ടർ ദിനേശ് കുമാർ പറഞ്ഞു.

കേരളത്തിനാകെ അഭിമാനകരമായ ഈ പുരസ്കാരം  കണ്ണൂർ എയർപോർട്ടിലെ യാത്രക്കാർക്ക്​ സമർപ്പിക്കുന്നതായും അദേഹം പറഞ്ഞു.   കണ്ണൂർ വിമാനത്താവളത്തിന്റെ പ്രശസ്തി ഉയർത്താനും,കൂടുതൽ സേവനങ്ങൾ നൽകാനുമുള്ള വലിയ പ്രചോദനമാണ് ഈ പുരസ്കാരമെന്ന്​  ചീഫ് ഓപ്പറേറ്റിങ്​ ഓഫീസർ അശ്വനി കുമാർ അഭിപ്രായപ്പെട്ടു.

ആഗോള വ്യോമയാന മേഖലയിലെ ഏറ്റവും പ്രശസ്തമായ എസിഐ.- എഎസ്ക്യു  അവാർഡുകൾ  വിമാനത്താവളത്തെക്കുറിച്ചുള്ള യാത്രക്കാരുടെ നേരിട്ടുള്ള അഭിപ്രായങ്ങളെ അടിസ്ഥാനമാക്കിയാണ് നൽകുന്നത്. ശുചിത്വം, അനുബന്ധ സൗകര്യങ്ങൾ, സ്റ്റാഫിന്‍റെ പെരുമാറ്റം, കാര്യക്ഷമത, മൊത്തത്തിലുള്ള സംതൃപ്തി എന്നീ മേഖലകളിലാണ് വിലയിരുത്തൽ നടത്തുന്നത്.