കൊളപ്പ -നായ്ക്കാലി റോഡ്​ പ്രവൃത്തി ഉദ്​ഘാടനം ചെയ്തു

 '

മട്ടന്നൂർ :മട്ടന്നൂർ നിയോജക മണ്ഡലത്തിലെ മട്ടന്നൂർ കൊടോളിപ്രം കൊളപ്പ റോഡിനെയും മട്ടന്നൂർ ഇരിക്കൂർ റോഡിനെയും  ബന്ധിപ്പിക്കുന്ന റോഡ്​ കണക്ടിങ്​ മരുതായി പാലം  അഭിവൃദ്ധിപ്പെടുത്തൽ പ്രവൃത്തിയുടെ ഉദ്ഘടാനം  കെ കെ ശൈലജ എംഎൽഎ  നിർവഹിച്ചു.

 ഈ മേഖലയിലെ കർഷകരും വിദ്യാർഥികളുമടക്കം നാനാതുറകളിൽപ്പെട്ട ജനങ്ങൾ ആശ്രയിക്കുന്ന പ്രധാനപ്പെട്ട റോഡാണിത്. ശോച്യാവസ്ഥയിലുള്ള ഈ റോഡ് അഭിവൃദ്ധിപ്പെടുത്തുന്നതിന് വേണ്ടി നാല്​കോടി രൂപയുടെ ഭരണാനുമതി ലഭിച്ചിരുന്നു.

ഈ പ്രവൃത്തിയിൽ നിലവിലുള്ള 3.80 മീറ്റർ കാരിയേജ് വേ 5.50 മീറ്റർ വീതിയിൽ ഉപരിതലം ബലപ്പെടുത്തി ബിഎം ആൻഡ്​ ബിസി നിലവാരത്തിൽ നവീകരിക്കുകയും നിലവിലുള്ള നാല്​ കൾവെർട്ടുകൾ വീതി കൂട്ടി പുതുക്കിപണിയുകയും ചെയ്യും. 1135 മീറ്റർ നീളത്തിൽ ഡ്രൈനേജും 1050 മീറ്റർ നീളത്തിൽ ഷോൾഡർ കോൺക്രീറ്റും പ്രവൃത്തിയിൽ ഉൾപ്പെടുത്തിയിട്ടുണ്ട്. കൂടാതെ നിലവിലുള്ള റോഡിന്‍റെ കയറ്റം കുറക്കുന്ന പ്രവൃത്തിയും ഇതിൽ ഉൾപ്പെടുത്തിയിട്ടുണ്ട്.

ഈ പ്രവൃത്തി പൂർത്തിയാകുന്നതോടെ  പ്രദേശത്തുകാർ അനുഭവിക്കുന്ന യാത്രക്ലേശത്തിന്​ പരിഹാരമാകും.  ഉദ്​ഘാടന ചടങ്ങിൽ പഞ്ചായത്ത്​ പ്രസിഡന്‍റ്​ പികെ ഷൈമ അധ്യക്ഷയായി. പഞ്ചായത്ത്​ വൈസ്​ പ്രസിഡന്‍റ്​ പി പത്​മനാഭൻ, ആരോഗ്യ സ്റ്റാൻഡിങ്​ കമ്മിറ്റി ചെയർമാൻ പി സി ശ്രീകല, ഇരിട്ടിബ്ലോക്ക്​ പഞ്ചായത്ത്​ മെമ്പർ കെ സി രാജ​ശ്രീ, പി വി ആനന്ദ ബാബു, കെ വി പുരുഷോത്തമൻ എന്നിവർ സംസാരിച്ചു. പിഡെബ്ല്യുഡി അസി.എൻജിനീയർ ടി വി രേഷ്മ റിപ്പോർട്ട്​ അവതരിപ്പിച്ചു. വാർഡ്​ മെമ്പർ സി കെ സുരേഷ്​ ബാബു സ്വാഗതവും പഞ്ചായത്ത്​ സെക്രട്ടറി കെ പി സുധീർ നന്ദിയും പറഞ്ഞു.