ടിക് ടോക്കിനും ഇൻസ്റ്റഗ്രാമിനും ചെക്ക്; ഓപ്പൺഎഐയുടെ ‘സോറ’ എഐ വീഡിയോ ആപ്പ് എത്തുന്നു

കൊച്ചി:ആർട്ടിഫിഷ്യൽ ഇൻ്റലിജൻസ് രംഗത്തെ അതികായന്മാരായ ഓപ്പൺഎഐ ടിക് ടോക്കിനും യൂട്യൂബിനും നേരിട്ടുള്ള വെല്ലുവിളിയുമായി രംഗത്തെത്തിയിരിക്കുന്നു. വിപ്ലവകരമായ എഐ വീഡിയോ ജനറേഷൻ മോഡലായ സോറ 2-ന്റെ പ്രഖ്യാപനത്തോടൊപ്പം AI വീഡിയോയെ അടിസ്ഥാനമാക്കിയുള്ള ഒരു പുതിയ സോഷ്യൽ മീഡിയ ആപ്ലിക്കേഷനായ ‘സോറ’-യും കമ്പനി അവതരിപ്പിച്ചു. വീഡിയോ ലോകത്ത് ഒരു പുതിയ യുഗത്തിന് തുടക്കമിടാൻ ലക്ഷ്യമിട്ടുള്ള ഒരു ഇരട്ട പ്രഹരമാണിത്.

2024 ഫെബ്രുവരിയിൽ പുറത്തിറങ്ങിയ ആദ്യ സോറ മോഡലിന്റെ പരിഷ്കരിച്ച രൂപമാണ് സോറ 2. സംഭാഷണങ്ങൾ കൃത്യമായി സമന്വയിപ്പിക്കാനും (Dialogue Sync), റിയലിസ്റ്റിക് ശബ്‌ദ ഇഫക്റ്റുകൾ (Sound Effects) നൽകാനും, സ്വാഭാവികമായ ചലനങ്ങൾ (Realistic Motion) സൃഷ്ടിക്കാനും ഇതിന് കഴിയും. അതായത് കേവലം ടെക്സ്റ്റ് നിർദ്ദേശങ്ങൾ (Text Prompts) നൽകിയാൽ മതി, ഓഡിയോ സഹിതമുള്ള ഹൈ-ഡെഫനിഷൻ AI വീഡിയോ ക്ലിപ്പുകൾ നിമിഷങ്ങൾക്കുള്ളിൽ ആപ്പ് നിർമ്മിച്ചുനൽകും.

പുതിയ സോറ ആപ്പിലെ ഏറ്റവും സവിശേഷമായ ഫീച്ചറാണ് ‘കാമിയോസ്’ (Cameos). ഇത് ഉപയോഗിച്ച് ഉപയോക്താക്കൾക്ക് സ്വയം AI നിർമ്മിത വീഡിയോകളിൽ പ്രത്യക്ഷപ്പെടാൻ സാധിക്കും. ആവശ്യമെങ്കിൽ നിങ്ങളുടെ സുഹൃത്തുക്കളെയും ഇതുപോലെ വീഡിയോയിലേക്ക് ചേർക്കാൻ കഴിയും. ഈ ഫീച്ചർ ഉപയോഗിക്കുന്നതിനായി ഉപയോക്താക്കൾ ഒറ്റത്തവണ വീഡിയോയും ഓഡിയോ റെക്കോർഡിംഗും നൽകി അവരുടെ വിവരങ്ങൾ സാക്ഷ്യപ്പെടുത്തേണ്ടതുണ്ട്. ഇത് വീഡിയോ കണ്ടൻ്റിന് കൂടുതൽ വ്യക്തിപരമായ തലം നൽകുന്നു