അയ്യൻകുന്നിനെ വിറപ്പിച്ച് ജനവാസ കേന്ദ്രങ്ങളിൽ കാട്ടാനയിറങ്ങി : നാല് വാർഡുകളിൽ ജാഗ്രതാ നിർദ്ദേശം
ഇരിട്ടി : 'അയ്യൻകുന്ന് പഞ്ചായത്തിലെ ജനവാസ മേഖലയിൽ ഭീതി പടർത്തിയ കാട്ടു കൊമ്പനെ തുരത്തൽ നടപടി തിങ്കളാഴ്ച്ച രാവിലെ വനം വകുപ്പ് ഉദ്യോഗസ്ഥർ പുനരാരംഭിച്ചു.
ഞായറാഴ്ച്ച പുലർച്ചെ മുതലാണ് കാട്ടാനയുടെ വിളയാട്ടം തുടങ്ങിയത്. പുലർച്ചെ അഞ്ചോടെ അങ്ങാടിക്കടവ് സ്കൂളിന് സമീപം കണ്ട കൊമ്പൻ പിന്നീട് വലിയപറമ്പിൻകരി ആശാൻ കുന്നിലെ റബർ തോട്ടത്തിൽ നിലയുറപ്പിക്കുകയായിരുന്നു.
വനം വകുപ്പ്, ആർആർടി, പോലീസ് ഉൾപ്പെടെയുള്ള സംഘം സ്ഥലത്തെത്തി ആനയെ നിരീക്ഷിച്ചു. പാറയ്ക്കാമല മേഖലയിൽനിന്ന് എത്തിയ കൊമ്പനാണ് രാത്രി വൈകിയും തിരികെ പോകാതെ മേഖലയിൽ പരിഭ്രാന്തി പരത്തിയത്.
പ്രദേശവാസികൾ വീടിനു വെളിയിൽ ഇറങ്ങരുതെന്ന് പഞ്ചായത്ത് കർശന നിർദേശം നൽകിയിട്ടുണ്ട്. അയ്യൻകുന്ന് മേഖലയിൽ ഉച്ചഭാഷിണിയിലൂടെ പ്രദേശവാസികൾക്കു മുന്നറിയിപ്പ് നൽകി. ആന കടന്നുപോകാൻ സാധ്യതയുള്ള സ്ഥലങ്ങളിൽ പോലീസും വനം വകുപ്പ് അധികൃതരും കാവൽ ഏർപ്പെടുത്തി.
ഞായറാഴ്ച്ച ഉച്ചകഴിഞ്ഞു മൂന്നരയോടെ ആശാൻകുന്നിൽ നിലയുറപ്പിച്ച ആനയെ വനം ആർആർടി സംയുക്ത ടീം തുരത്തുന്നതിനുള്ള നടപടികൾ തുടങ്ങിയിരുന്നു . ജനവാസ മേഖലയായ ഇവിടം വനത്തിനോട് ചേർന്ന പ്രദേശം ആയതുകൊണ്ട് ഇതുവഴി വനത്തിലേക്കു കടത്തിവിടാൻ ശ്രമിക്കുന്നതിനിടെ ഈന്തുംകരി അടിവാരത്തിനു സമീപം റോഡ് മുറിച്ചുകടക്കാതെ ആന അക്രമാസക്തമാകുകയായിരുന്നു.
ഇവിടെയുള്ള രണ്ടു വീടുകളുടെ ഷെഡും ഒരു മെഷീൻ പുരയും ആന തകർത്തു. കുരിശുംമൂട്ടിൽ ചാക്കോ, പുത്തൻ പുരയ്‌ക്കൽ റോയി എന്നിവരുടെ വീടിന്‍റെ ഷെഡുകളും വട്ടുകുളം ബിജോയിയുടെ മെഷീൻ പുരയുമാണ് തകർത്തത്.
അക്രമാസക്തനായ ആനയെ രാത്രി വൈകി തുരത്തുക പ്രയാസമായതിനാൽ ഞായറാഴ്ച്ച വൈകിട്ട് ആറരയോടെ അധികൃതർ തുരത്തൽ ശ്രമം നിർത്തുകയായിരുന്നു. വെളിച്ചക്കുറവും പരിചയമില്ലാത്ത കുന്നിൻ പ്രദേശവും തുരത്തലിനു തടസമായി.
പ്രദേശവാസികൾവെളിയിൽ ഇറങ്ങി ശബ്ദവച്ചതും കൂട്ടം കൂടി നിന്നതും പലപ്പോഴും അധികൃതർക്ക് വലിയ വെല്ലുവിളിയായിരുന്നു. രണ്ട് തവണ റോഡ് മുറിച്ചു കടക്കാൻ വന്ന ആന തിരികെ പോയത് ജനങ്ങൾ കൂട്ടമായി നിന്ന് ശബ്ദം ഉണ്ടാക്കിയതുകൊണ്ടാണെന്ന് വനം വകുപ്പ് ഉദ്യോഗസ്ഥർ പറഞ്ഞു. ആനയെ വനത്തിലേക്ക് തുരത്തുന്നതിൻ്റെ ഭാഗമായി ഇന്ന് പുലർച്ചെ ആറു മണി മുതൽ വൈകിട്ട്ആറ് മണി വരെ അയ്യൻകുന്ന് ഗ്രാമപഞ്ചായത്തിൽ ആറ്, ഏഴ്, ഒൻപത്, 11 എന്നീ വാർഡുകളിൽ പൊതുജനങ്ങൾ ഒത്തു കൂടുന്നത് നിരോധിച്ച് ജില്ലാ കലക്ടർ അരുൺ കെ. വിജയൻ ഉത്തരവിട്ടിട്ടുണ്ട്.
Comments
Post a Comment