മാതൃഭാഷയ്ക്ക് മസ്തിഷ്ക്ക മരണം വിധിക്കരുത്: മലയാള ഭാഷാപോഷണവേദി
കണ്ണൂർ:മാതൃഭാഷയുടെ എരിവും പുളിയും മധുരവും ചവർപ്പും നുണഞ്ഞു വളരേണ്ടുന്ന കൊച്ചു കുട്ടികളെ ഇംഗ്ലീഷ് മീഡിയത്തിന്റെ ഇരുട്ടറയിൽ തപ്പിത്തടയാൻ വിധിക്കുന്ന കേരളത്തിലെ വിദ്യാഭ്യാസരീതി അടിയന്തിരമായി തിരുത്തണമെന്ന് മലയാള ഭാഷാപോഷണവേദി കണ്ണൂർ ജില്ലാ കൺവെൻഷൻ അധികാരികളോട് ആവശ്യപ്പെട്ടു. കേരളത്തിലെ പ്രൈമറി വിദ്യാലയങ്ങളിൽ, പ്രത്യേകിച്ചും സ്വകാര്യ മാനേജ്മെന്റിന്റെ കച്ചവടവാശിയിൽ ഇംഗ്ലീഷ് മീഡിയ ക്ലാസ്സുകളുടെ പേരിൽ നടക്കുന്ന മാതൃഭാഷാ വധം അതിഭീഷണമാണെന്ന് യോഗം വിലയിരുത്തി.രവി നമ്പ്രത്തിന്റെ അദ്ധ്യക്ഷതയിൽ പ്രശസ്ത സാഹിത്യകാരൻ ടി.കെ. ഡി മുഴപ്പിലങ്ങാട് ഉദ്ഘാടനം ചെയ്തു. ജനു ആയിച്ചാൻകണ്ടി പ്രവർത്തന റിപ്പോർട്ട് അവതരിപ്പിച്ചു. സത്യൻ എടക്കാട്, പി.കെ.രതീഷ് കുമാർ , പ്രസീത പറശ്ശിനിക്കടവ്, ടി.വി. ഹമീദ എന്നിവർ സംസാരിച്ചു.രാജൻ വി. കണ്ണപുരം സ്വാഗതവും, ഇ.കെ. സിറാജ് നന്ദിയും പറഞ്ഞു.പുതിയ ഭാരവാഹികളായി രവി നമ്പ്രം (പ്രസിഡണ്ട് ), രാജൻ വി കണ്ണപുരം (വൈസ് പ്രസിഡണ്ട് ) ജനു ആയിച്ചാൻകണ്ടി (ജന. സിക്രട്ടറി), ഇ കെ സിറാജ് (ജോ. സിക്രട്ടറി) എന്നിവരെ തിരഞ്ഞെടുത്തു.
Comments
Post a Comment