മട്ടന്നൂരിൻ്റെ മനം കവർന്ന് യുവ സ്ഥാനാർത്ഥി വി കെ സനോജ്

മട്ടന്നൂർ :കനത്ത വേനൽ ചൂടൊന്നും സ്വീകരണകേന്ദ്രങ്ങളിൽ എത്തുന്നവർക്ക്​ തടസ്സമാകുന്നില്ല. മട്ടന്നൂർ മണ്ഡലം എൽഡിഎഫ്​ സ്ഥാനാർഥി വി കെ സനോജിന്‍റെ സ്വീകരണ കേന്ദ്രങ്ങളിൽ ചൂടിനെ തോൽപ്പിച്ചാണ്​ ജനങ്ങൾ എത്തുന്നത്​. മുത്തുക്കുടകളും വർണ ബലൂണുകളും ചെണ്ടവാദ്യവുമൊരുക്കിയാണ്​ അവർ സ്ഥാനാർഥിയെ വരവേൽക്കുന്നത്​​. സ്വീകരണത്തിന്​ കൊഴുപ്പേകാൻ പടക്കങ്ങളും.

സ്വീകരണ കേന്ദ്രങ്ങളിലെല്ലാം കുറിക്കു കൊള്ളുന്ന ചെറു പ്രസംഗം മാത്രം. നന്മകളെ കാത്തുസൂക്ഷിക്കാനുള്ള സമരമാണ്​ എൽഡിഎഫിന്​ തെരഞ്ഞെടുപ്പെടുപ്പെന്ന്​ ഓർമപ്പെടുത്തൽ. ഇടതുപക്ഷം വിജയിക്കേണ്ടതിന്‍റെ ആവശ്യം ബോധ്യപ്പെടുത്തൽ. ജനങ്ങൾക്ക്​ നൽകിയ വാഗ്ദാനങ്ങളെല്ലാം പൂർത്തീകരിച്ചശേഷം ഏറെ അഭിമാനത്തോടെയാണ്​ ജനങ്ങളെ അഭിമുഖീകരിക്കുന്നതെന്ന്​ ചൂണ്ടിക്കാട്ടൽ. ഉമ്മൻചാണ്ടിയുടെ ഇരുണ്ടകാലവും എൽഡിഎഫിന്‍റെ വികസനകാലവും താരതമ്യം ചെയ്തുകൊണ്ട്​ എല്ലാവരും കണക്കാണെന്ന്​ പറയുന്നവർക്കുള്ള മറുപടി. ഒപ്പം ഇടതുപക്ഷവും വലതുപക്ഷവും തമ്മിലുള്ള വ്യത്യാസം സംബന്ധിച്ച്​ അക്കമിട്ട്​ നിരത്തൽ. ഇനിയും ഒട്ടേറെ കാര്യങ്ങൾ ചെയ്യാനുണ്ട്​. അതിന്​ തുടർഭരണം ഉണ്ടാവണം. കുറഞ്ഞ സമയംകൊണ്ട്​ ഗൗരവമായ കാര്യങ്ങൾ സംവദിച്ച്​ അടുത്ത സ്വീകരണ കേന്ദ്രത്തിലേക്ക്​ -കൂടെയുണ്ട്​ നാടിനൊപ്പമെന്ന് ​ഓർമ്മപ്പെടുത്തുകയാണ്​ നാട്യങ്ങളില്ലാത്ത നാട്ടുകാരനായ സ്ഥാനാർഥി വി കെ സനോജ്​.​   

കീഴല്ലൂർ പഞ്ചായത്തിലെ ആനക്കുനിയിലായിരുന്നു  പര്യടനത്തിന്‍റെ തുടക്കം. രാവിലെ ഒമ്പതോടെയാണ്​ സ്ഥാനാർഥി ഇവിടെയെത്തിയത്​. സ്ഥാനാർഥിയെ വരവേൽക്കാൻ  കുട്ടികളും സ്ത്രീകളും ഉൾപ്പെടെ  നല്ലൊരു  ജനാവലി ഇവിടെയെത്തിയിരുന്നു. കൊന്നപ്പൂങ്കുല നൽകിയാണ് വി കെ സനോജിനെ സ്വീകരിച്ചത്​. കൈപിടിച്ചു കുലുക്കിയും കുശലം പറഞ്ഞും സെൽഫിയെടുത്തുമാണ്​ പ്രീയപ്പെട്ട സ്ഥാനാർഥിയോടുള്ള സ്​നേഹം ജനങ്ങൾ പ്രകടിപ്പിച്ചത്​. സ്വീകരണ ചടങ്ങിൽ കെ ടി വിജേഷ്​ അധ്യക്ഷനായി. എൻ വി ചന്ദ്രബാബു സംസാരിച്ചു. കെ വി മിനി സ്വാഗതം പറഞ്ഞു. തുടർന്ന്​ ഇ എം എസ് നഗർ, കൊതേരി കീഴടത്ത്, വെള്ളിയാം പറമ്പ്, ഉത്തിയൂർ, കാര, ഇല്ലം ഭാഗം, പാലോട്ടു പള്ളി, ആണിക്കരി, മുണ്ടയോട്, വെമ്പടി, കോളാരി, തലച്ചങ്ങാട്, ഈയ്യം ബോഡ്, തെക്കം പൊയിൽ, വാഴക്കാൽ, വഞ്ഞേരി, കരുവള്ളി , പൂന്തലോട്, കാഞ്ഞിരാട് എന്നിവിടങ്ങളിലും സ്വീകരണം നൽകി. മച്ചൂർ മലയിലായിരുന്നു   സമാപനം.  

വിവിധ കേന്ദ്രങ്ങളിൽ സിപിഐ എം ജില്ലാ സെക്രട്ടറി കെ കെ രാഗേഷ്​,  നേതാക്കളായ എം രതീഷ്​, കെ സി മനോജ്, എം രാജൻ, കെ സി അബ്​ദുൽ ഖാദർ, മുണ്ടാണി പുരുഷോത്തമൻ, കെ ടി ജോസ്​ തുടങ്ങിയവർ സംസാരിച്ചു.