മട്ടന്നൂരിനെ ചെങ്കടലാക്കി വി.കെ സനോജിൻ്റെ കൊട്ടി ക്കലാശം

മട്ടന്നൂർ: മട്ടന്നൂരിനെ ചുവപ്പിച്ച് എൽഡിഎഫ സ്ഥാനാർത്ഥി വി കെ സനോജിൻ്റെ കൊട്ടി കലാശം.

തെരഞ്ഞെടുപ്പ്​ പ്രചാരണത്തിന്‍റെ സമാപനം കുറിച്ച്​  മണ്ഡലത്തിന്‍റെ വിവിധ ഭാഗങ്ങളിൽ എൽഡിഎഫ്​ സംഘടിപ്പിച്ച    കൊട്ടിക്കലാശം മണ്ഡലം എൽഡിഎഫ്​ സ്ഥാനാർഥി വി കെ സനോജിനൊപ്പം തന്നെയെന്ന്​ തെളിയിക്കുന്നതായി. മണ്ഡലത്തിലെ എൽഡിഎഫിന്‍റെ അജയ്യത വിളിച്ചോതിയാണ്​ കൊട്ടിക്കലാശം അരങ്ങേറിയത്​. ചൊവ്വാഴ്ച്ച വൈകിട്ട് ചെറു ജാഥകൾ സംഗമിച്ച് മട്ടന്നൂർ ബസ്​സ്റ്റാൻഡ്​ അക്ഷരാർഥത്തിൽ ചെങ്കടലായി മാറി.  ആവേശം വാനോളമുയർന്ന കൊട്ടിക്കലാശത്തിൽ ആയിരങ്ങളാണ്​ അണിനിരന്നത്​. ചെ​ങ്കൊടി വാനിലുയരെ പാറിച്ചും ഡിജെക്കൊപ്പം ആടിയും പാടിയും പ്രവർത്തകർ കൊട്ടിക്കലാശം അവിസ്മരണീയമാക്കി.  ചുവന്ന കാറുകൾ ഉൾപ്പെടെ നിരവധി വാഹനങ്ങളും ഇരുചക്ര വാഹനങ്ങളും അണിനിരന്ന കൊട്ടിക്കലാശം മട്ടന്നൂർ മണ്ഡലത്തിന്‍റെ മനസ്സ്​ ഇടതിനൊപ്പം തന്നെയെന്ന്​ വിളിച്ചോതുന്നതായി. 

വേനൽചൂടിനെ വകവെക്കാതെ വൈകിട്ട്​ മൂന്നോടെ തന്നെ പ്രവർത്തകരും വാഹനങ്ങളും ചെമ്പതാകയുമായി മട്ടന്നൂരിലേക്ക്​ ഒഴുകിയെത്താൻ തുടങ്ങിയിരുന്നു. നാല്​ കഴിയുമ്പോഴേക്കും മട്ടന്നൂർ ബസ്​സ്റ്റാൻഡ്​ നിറഞ്ഞു കവിഞ്ഞു.  ആവേശം കൊടുമുടി കയറിയ പ്രവർത്തകർ കൈമെയ്​ മറന്ന്​ കൊട്ടിക്കലാശം അവിസ്മരണീയമാക്കിയപ്പോൾ മട്ടന്നൂർ  മണ്ഡലത്തിൻ്റെ വിജയവിളംബരമായി മാറി. 

സിപിഐ എം ജില്ലാ സെക്രട്ടറിയറ്റ്​ അംഗം പി പുരുഷോത്തമൻ സ്ഥാനാർഥി വി കെ സനോജ്​, എന്നിവർ സംസാരിച്ചു. ഏരിയാ സെക്രട്ടറി എം രതീഷ്​ സ്വാഗതം പറഞ്ഞു. മണ്ഡലം കമ്മിറ്റി കൺവീനർ എൻ വി ചന്ദ്ര ബാബു, ചെയർമാൻ സി വിജയൻ, സി വി ശശീന്ദ്രൻ, സരീഷ്​ പൂമരം, മുഹമ്മദ്​ സിറാജ്​, കെ ടി ജോസ്​, കെ പി രമേശൻ, സി എച്ച്​ വത്സലൻ, അണിയേരി അച്യുതൻ, സിദ്ദീഖ്​ മണ്ണൂർ, മണാട്ട്​ കുമാരൻ എന്നിവർ നേതൃത്വം നൽകി. 

കൂടാളിയിൽ ഇ. സജീവൻ, കൊളോളത്തു പി.പി.നൗഫൽ എന്നിവർ നേതൃത്വം നൽകി