നാദാപുരത്ത് ഇറങ്ങിയത് പുലിയോ? കൂട് സ്ഥാപിച്ച് വനം വകുപ്പ്

കോഴിക്കോട്: നാദാപുരം കുമ്മങ്കോട് അജ്ഞാത ജീവിയുടെ ആക്രമണത്തില്‍ രണ്ടുപേര്‍ക്ക് പരിക്കേറ്റ സംഭവത്തിന് പിന്നാലെ പ്രദേശത്ത് കൂട് സ്ഥാപിക്കാനുള്ള നടപടി തുടങ്ങി. താമരശ്ശേരി, കുറ്റ്യാടി, പെരുവണ്ണാമൂഴി ആര്‍ആര്‍ടി സംഘം സ്ഥലത്തെത്തി. നാദാപുരം പൊലീസും റവന്യൂ ഉദ്യോഗസ്ഥരും സ്ഥലത്ത് ക്യാമ്പ് ചെയ്യുകയാണ്.

വനം വകുപ്പ്ഉദ്യോഗസ്ഥരുടെ നേതൃത്വത്തില്‍ രാത്രിയിലും പ്രദേശത്ത് തെരച്ചില്‍ തുടരുകയാണ്. പ്രദേശത്ത് ജാഗ്രതാ നിര്‍ദ്ദേശം നല്‍കിയിട്ടുണ്ട്. പ്രദേശത്തെ മദ്രസ, കുമ്മങ്കോട് ഈസ്റ്റ് എല്‍പി സ്‌കൂള്‍, സൗത്ത് എല്‍പി സ്‌കൂള്‍ എന്നിവക്ക് ഇന്ന് അവധി പ്രഖ്യാപിച്ചു. മറ്റ് വിദ്യാഭ്യാസ സ്ഥാപനങ്ങളിലേക്ക് പോകുന്ന വിദ്യാര്‍ത്ഥികള്‍ ജാഗ്രത പാലിക്കണമെന്നും നിര്‍ദ്ദേശമുണ്ട്.

വനത്തോട് ചേർന്നുകിടക്കുന്ന സ്ഥലമാണ് കുമ്മങ്കോട്. രണ്ട് പേരെ പുലി ആക്രമിച്ചെന്നാണ് നാട്ടുകാർ ആരോപിച്ചത്. യുവാവിനും വീട്ടമ്മയ്ക്കുമാണ് ആക്രമണത്തിൽ പരിക്കേറ്റത്. പുലിയ്ക്ക് സമാനമായ ജീവി റോഡിലൂടെ പോകുന്ന ദൃശ്യങ്ങൾ നാട്ടുകാർ ഫോണിൽ പകർത്തുകയും ചെയ്തിരുന്നു. എന്നാൽ ഇതുസംബന്ധിച്ച് വനംവകുപ്പിന്‍റെ ഭാഗത്ത് നിന്നുള്ള ഔദ്യോഗിക സ്ഥിരീകരണം പുറത്തുവന്നിട്ടില്ല.