രശ്മിക മന്ദാനയുടെ ‘മൈസ’ ടീസർ പുറത്ത്; ആരാധകരെ ആവേശത്തിലാക്കി കിടിലൻ ആക്ഷൻ

ചെന്നൈ:തെന്നിന്ത്യൻ സൂപ്പർസ്റ്റാർ രശ്മിക മന്ദാനയെ പ്രധാന കഥാപാത്രമാക്കി രവിന്ദ്ര പുല്ലെ സംവിധാനം ചെയ്യുന്ന പുതിയ ചിത്രം ‘മൈസ’ യുടെ ടീസർ പുറത്ത് വിട്ടു. ഇന്ത്യയിലെ തന്നെ ആദ്യത്തെ ‘ഫീമെയിൽ ലീഡ് പാൻ-ഇന്ത്യൻ ആക്ഷൻ ഡ്രാമ’ ചിത്രമായിട്ടാണ് ‘മൈസ’ ഒരുങ്ങുന്നത്. നവംബർ 27 നാണ് സിനിമ പ്രദർശനത്തിനെത്തുന്നത്.

ഗോത്രവിഭാ​ഗത്തിൽപ്പെട്ട ശക്തയായ സ്ത്രീ കഥാപാത്രത്തെയാണ് രശ്മിക ചിത്രത്തിൽ അവതരിപ്പിക്കുന്നത്. കൂടാതെ ഇതുവരെ കാണാത്ത പുതിയ ലുക്കും, അഭിനയവും, ആക്ഷനുമാണ് സിനിമയിൽ കാഴ്ച വെച്ചിരിക്കുന്നതെന്നാണ് ടീസർ സൂചിപ്പിക്കുന്നത്.

ചിത്രത്തിൽ രശ്മിക അതി കഠിനമായ ആക്ഷൻ രം​ഗങ്ങളിൽ ‍‍ഡ്യൂപില്ലാതെയാണ് അഭിനയിച്ചിരിക്കുന്നതെന്നാണ് റിപ്പോർട്ടുകൾ. കൂടാതെ ആക്ഷൻ രം​ഗങ്ങൾ ചെയ്യുന്നതിനായി രശ്മിക ബാങ്കോക്കിൽ പ്രത്യേക മാർഷ്യൽ ആർട്സ് പരിശീലനവും നേടിയിരുന്നു. ചിത്രീകരണത്തിനെ താരത്തിന്റെ വലതു ഇടുപ്പിലെ ഒരു ടെൻഡൻ വേർപെട്ടതായും നടി വെളിപ്പെടുത്തിയിരുന്നു.

ചിത്രത്തിന്റെ ​ഗാനങ്ങൾ ഒരുക്കിയിരിക്കുന്നത് ‍‍ജെയ്ക്സ് ബിജോയാണ്. അൺഫോർമുല ഫിലിംസിൻ്റെ ബാനറിൽ അജയ് സായിപുറെഡ്ഡി, അനിൽ സായപുറെഡ്ഡി, വീരസായി ഗോപ എന്നിവർ ചേർന്നാണ് നിർമ്മിച്ചിരിക്കുന്നത്. ഛായാ​ഗ്രഹണം നിർവഹിച്ചിരിക്കുന്നത് ശ്രേയാസ് കൃഷ്ണയാണ്. ഈശ്വരി റാവു, രാഹുൽ രവീന്ദ്രൻ, സമുദ്രക്കനി, റാവു രമേഷ്, താരക് പൊന്നപ്പ, നിധി സിംഗ് തുടങ്ങിയവരും ചിത്രത്തിലുണ്ട്.