എടിഎം കൗണ്ടറിനുള്ളിൽ പാമ്പ്, പണമെടുക്കാൻ വന്നയാൾ ഓടി രക്ഷപ്പെട്ടു

തിരുവല്ല: നഗരപ്രാന്തത്തിലുള്ള കുറ്റപ്പുഴയിൽ എടിഎം കൗണ്ടറിനുള്ളിൽ പാമ്പ് കയറിയ സംഭവം പ്രദേശത്ത് ആശങ്കയുണ്ടാക്കി.ഇന്ത്യൻ ഓവർസീസ് ബാങ്കിന്റെ എടിഎം കൗണ്ടറിലാണ് സംഭവം ഉണ്ടായത്. ശനിയാഴ്ച വൈകിട്ട് ഏഴരയോടെ പണം പിൻവലിക്കാൻ എത്തിയ നാട്ടുകാരനാണ് എടിഎമ്മിനുള്ളിൽ പാമ്പിനെ കണ്ടത്. ആളുകളുടെ അനക്കം ശ്രദ്ധിച്ച പാമ്പ് കൗണ്ടറിനുള്ളിലെ ഒരു മൂലയിൽ ഒളിച്ചിരിക്കുകയായിരുന്നു.ഭയന്ന ഇയാൾ പുറത്തേക്ക് ഇറങ്ങി ബഹളം വച്ചതോടെ സമീപവാസികളും സ്ഥലത്തെത്തി.സംഭവത്തെ തുടർന്ന് എടിഎം കൗണ്ടർ പുറത്തുനിന്ന് അടച്ചിരിക്കുകയാണ്. വനം വകുപ്പ് ഉദ്യോഗസ്ഥരെ വിവരം അറിയിച്ചു. വനംവകുപ്പ് ഉദ്യോഗസ്ഥരെത്തി വിശദമായ പരിശോധന നടത്തിയിട്ടും പാമ്പിനെ കണ്ടെത്താൻ കഴിയാത്ത സാഹചര്യത്തിൽ പരിശോധന അവസാനിപ്പിച്ചു.